كاردو تك

هنشاركك خبرتنا فى التكنولوجيا ، خليك متابعنا

هل روبوت تسلا هيحكم العالم؟

آخر اختراعات Elon Musk
Elon Musk كشفلنا عن آخر منتجاته في شركة تسلا وهو الروبوت ” بوت ” اللي متوقع انه هيغير حاجات كتير في العالم زي اللي حصل في عالم السيارات من تغيير قبل كدا بصناعته لعربيات تسلا ، هيقدر الروبوت “بوت ” يساعد في الانشطه اللي بتاخد وقت طويل واللي مبيقدرش عليها الانسان .

Tesla خدت استراحة من صناعة السيارات وبدأت في تطوير روبوت “بوت” ، تعالو نتكلم عليه شويه …
“Tesla Bot” هو روبوت رشيق وزنه 125 رطل بما يعادل 57 كيلو جرام مميز بتقنيات الذكاء الاصطناعي والتحكم الآلي لعربية Tesla عشان يتابع الطرق ويتنقل فيها وكمان بيقدر يمشي بسرعه 8 كيلومتر في الساعة.

تعالي نتكلم الاول عن الذكاء الصناعي اللي بتسخدمه شركة تسلا ؟
تسلا عندها قاعدة بيانات كبيره من معلومات وصور واشكال طرق ومركبات ولوح ارشادية اللي بتخلي العقل الالكتروني للسيارات يحلل الطريق والبيئة المحيطة بيه بشكل تلقائي بكل سهولة من القيادة الآلية ، غير ان الكاميرات اللي في السيارات فيها نظام حساس بيحسب المسافات والأبعاد ، في الغالب هي نفس قاعدة البيانات اللي هتبقي موجودة في الروبوت الجديد وهيكون معاها تعريفات تانيه عشان تتناسب مع الوظائف اللي هيقوم بيها الروبوت.

كده احنا بدأنا نفهم الروبوت هيتعامل معانا ازاي ، مثلا لو انت محتاج تبعت الروبوت يشتري مأكولات او فواكة هنلاقي ان الروبوت هيبقي مزود باغلب انواع المأكولات والفواكه وفي حالة انه معرفهاش هيستخدم قاعدة البيانات المباشرة من الانترنت عشان يتعرف علي المنتج ، يعني هيقدر يقرأ الباركود وياخد معلومات ومتستغربش ان الروبوت اللي انت مبرمجة انه يشتريلك المأكولات والفواكة انه يحذرك بأن المنتج ده مش هيناسبك من حيث السعرات الحرارية.


لو هاجمك اجري منه!!
في مؤتمر إيلون ماسك للإعلان عن روبوت “بوت” وضحلنا إيلون خواص الروبوت وقال ساخراً ان اقصي سرعه ليه هي 5 ميل في الساعه يعني سهل انك تجري منه .
طب ليه الخوف من الروبوت البشري ؟؟ وهل ممكن يحصل أخطاء وغلطات بشرية مع Tesla Bot ؟؟
مين شاف فيلم ويل سميث “I.Robot” وهيتخيل معايا انا اقصد ايه ..
حوادث تسلا في العربيات حقيقية وواقع وهي نوعين غالبا اما حوادث السواقة الالية او حريق بسبب البطاريات، والي عرفناه ان مهندسين Tesla Bot بيستخدموا نفس القيادة الذاتية في الروبوت.
في حوادث العربيات ممكن تقوم ادوات السلامة بحماية ارواح البشر زي الوسادة الهوائية او حزام الامان او من خلال جسم العربية الخارجي . لكن ايه هيكون عامل السلامة لما تتعامل مباشرة مع الروبوت وجها لوجه في مكان مغلق وكمان حجمه قريب من حجم الإنسان !

التكنولوجيا مع ولا ضد مصلحة البشرية ؟
التكنولوجيا دي على أد ماهي كويسة جدا الا انها مينفعش تاخد الثقة كاملة بسبب ان في حوادث ووفيات ليها صلة بوضع الطيار الآلي في عربيات Tesla وده هيخلينا نسأل إذا كانت التكنولوجيا هتنفع مع البشر ولا لا .
طبعا وجود الحوادث دي ميشجعش ان الروبوتات تستخدم نفس التقنيات اللي بتستخدمها Tesla في العربيات ، وفيه مخاطر وتهديدات تانيه للخصوصية لما الروبوت يشارك ويجمع بيانات ناس ممكن تكون حساسة وده الخلل اللي ممكن يحصل بين منظور الأخلاق والايديولوجية زي مثلا مكافحة الجريمة والاحتجاجات المدنية واكتر من كدا ، ولو فشل المهندسين في علاج الخلل ده هتودينا لكارثة كبيرة .
بس تسلا بتقول ان مقابل أي اختراع جديد لازم يكون في اخطاء وحوادث وهي مبتنكرش كدا بالعكس بتوثقها .
Tesla Bot ممكن يكون بريء لو كان مفيد وناجح من الناحية المالية عشان كدا لازم علي اللي اخترعوه واللي بيستهلكو وبيسثمرو فيه في المستقبل انهم يعالجو الاسئلة الصعبة بتاعته ، ممكن يكون في مخاطر خاصة زي ان البشر يعملو تعديلات غير مصرح بيها علي أداء الروبوت زي انه يتحرك بسرعة اكتر من اللي عملها مصممينه من غير ما يبصو للمخاطر اللي ممكن تحصل بسببه .

اشترك في كاردو تك

عشان تعرف الجديد وتتعلم أكتر عن التكنولوجيا

إحنا مين؟

لأن المنتجات الذكية بقت جزء اساسي فى حياتنا ، قررنا نطور ونقدم إبتكارات تخلي حياة الملايين أفضل وأسهل وكمان ننشر الوعي التقني وطرق استخدام التكنولوجيا فى حياتنا اليومية.

إبتكارات كاردو

قناة كاردو فى اليوتويب

اقرأ اكتر