هل هنعتمد علي الواقع الإفتراضي بدل الواقع الحقيقي ؟

تغيير اسم Facebook لـMeta

يوم الخميس 28 أكتوبر 2021 خرج مارك زوكربيرج في مؤتمر Facebook Connect عشان يعلن عن خبر هيغير شكل المستقبل والخبر ده هو تغيير اسم شركة Facebook عشان يبدأ معاها عصر جديد للتكنولوجيا.

مارك أعلن في المؤتمر ان شركة Facebook اتغير اسمها لشركة Meta والاعلان ده جه بعد ايام من اعلان الشركة عن بداية تأسيس العالم الافتراضي Metaverse، آلاف المهندسين شغالين دلوقتي بيطوروا ويصنعوا عالم افتراضي هتعيش فيه حياتك بالكامل من غير ما تتحرك من مكانك وكل ده ب Headset هتلبسه علي دماغك وينقلك للعالم الافتراضي،

تغيير اسم الشركة معناه إن فيسبوك هيكون مجرد ابلكيشن زيه زي ( واتس اب وانستجرام) وكل الابلكيشنز دي هتكون تابعة لشركة ميتا اللي أعلن عنها مارك،

يعني فيسبوك اللي حضرتك بتستخدمه هيفضل بنفس الاسم و اللي هيتغير بس اسم الشركة اللي بتدير كل الابلكيشنز دي وكمان أعلن عن اللوجو الجديد للشركة اللي هيكون على شكل علامة إنفينيتي باللون الازرق (∞)

ودي رسالة واضحة إن طموح الشركة في التكنولوجيا غير محدود، مارك قال كمان ان العالم كان شايف شركته مجرد شركة تواصل اجتماعي لكن في الاصل الشركة هدفها تبني تكنولوجيا ضخمة تربط الناس ببعضها و ميكنش ليها منافس وان الميتافيرس هتتخطي كل الحدود اللي نعرفها في التواصل الاجتماعي وده كان رد على كل الابلكيشنز اللي طلعت من قريب زي تيك توك وغيرها اللي بتنافس فيس بوك، مارك قال إن هدفه هو إن الميتافيرس يوصل في العشر سنين الجايين لمليار مستخدم وكمان اعلن ان الشركة هتصرف عشرة مليار دولار كبداية عشان تطور التقنيات اللازمة لبناء الميتافيرس وعرض مارك في مؤتمر كونكت رسومات شبيه بالعالم اللي هيبنيه وظهر فيه شخصيات شبه الرسوم المتحركة بتتحرك في الفضاء والشخصيات دي بتمثل الشخصيات الافتراضية لمستخدمين الميتافيرس ده غير شخصيات تانية في اجتماعات افتراضية واشخاص بتحضر مناسبات اجتماعية بصورة ثلاثية الابعاد.

أول منتجات شركة Metaverse

في المؤتمر أعلن مارك عن منتجين جداد اول منتج اسمه Project Cambria ودي عبارة عن Headset لتكنولوجيا الـ VR أو الواقع الافتراضي اللي موجودة حاليا في حاجات كتير زي عالم الالعاب واللي هيكون داخل فيها تكنولوجيا جديدة زي ان هتكون صورتك الرمزيه قادرة على اتصال طبيعي بالعين وتعكس تعابير وشك في نفس الوقت وده هيخلي الاشخاص اللي بتتفاعل معاهم يوصلهم احساسك، لكن المنتج التاني مختلف تماماً لانه هيكون اول Headset من انتاج شركة ميتا بشكلها الجديد واسم المنتج هيكون Project Nazare وده بقي هيكون بيدعم الواقع المعزز أو الميتافيرس بس لسه ميعاد اصداره مش اكيد . طب ما ال VR موجود من زمان ايه الفرق بين الـ VR اللي موجود حاليا والميتافيرس اللي بيعمله مارك؟؟ تكنولوجيا ال VR اللي موجودة في العالم حاليا بتكون عالم محدود على مستوى الألعاب لكن الميتافيرس هيكون عالم مفتوح بتكنولوجيا الواقع المعزز أو الـ AR، عالم تقدر تعمل فيه كل حاجه، تدخل سينما تعمل شوبينج وتحضر مناسبات اجتماعية ومارك قال ان هيكون فيه وظائف تقدر تقوم بيها عشان كدا العالم مقلوب من بعد مؤتمر كونكت.

خطر الواقعية الفائقة

التخوفات أن بعد تطور التكنولوجيا في المستقبل ممكن البشر يفقدوا الخط الفاصل بين الواقع والميتافيرس، زي ما قال الفلاسفة في أواخر القرن الـ 19 عن (الواقعية الفائقة)

بمعنى أن

البشر لو قدرو يصنعو صور ونماذج للواقع بشكل دقيق هتكون النتيجة في النهاية أن البشر يفقدوا الخط الفاصل بين الحقيقة والمحاكاة، والتخوفات الاجتماعية والسياسية اخطر بكتير لان لو سيطرت شركات علي الميتافيرس هيبقي كابوس على البشرية لأن الشركات دي هيبقي هدفها الأرباح والميتافيرس هيبقي وسيلة لجمع اكبر عدد من البشر و هيبقي ليهم سيطرة على حياتنا الشخصية ومعلوماتنا اكتر من اي وقت فات في تاريخ البشرية، اعمال سينمائية كتير اتكلمت عن خطر التطور التكنولوجي زي مسلسل Black Mirror.

موضوع انك تستبدل حياتك الواقعية بحياة افتراضية موضوع مرعب لو مش بتتعامل معاه بفهم وحظر، في الميتافيرس هتعمل كل حاجه حرفيا انت عايزها من غير ما تتحرك من مكانك وبدون رقابة وقوانين هتجمع فلوس وهتكون علاقات وتبني حياة في عالم وهمي مش موجود، الموت فيه عبارة عن انك تعمل Log out. القرار ف الاخر ليك.. تعيش حياة واقعية ولا تعيش حياة افتراضية ملهاش موجود؟؟